नवी दिल्ली (वृत्तसंस्था) : महाविकास आघाडीची सत्ता काळाची ५ वर्ष लॉकडाऊनमधे गेली असे कोणतेही चित्र राज्य सरकारला बिलकूल उभे करायचे नाही, त्याउलट हा लॉकडाऊन लवकरात लवकर संपावा यासाठीच प्रयत्न सुरु आहेत असे प्रतिपादन मुख्यमंत्री उद्धव ठाकरे यांनी केले आहे. ते आज समाजमाध्यमांवरून राज्यातल्या जनतेशी संवाद साधत होते.
कोरोनाच्या गुणाकाराला मर्यादा नसल्याने, राज्यातली कोरोनाबाधितांची संख्या वाढणार असल्याचा अंदाजही त्यांनी यावेळी वर्तवला. येत्या मे अखेरीसच कोरोनाविषयक देशातली स्थिती अधिक ठळकपणे समोर येईल. मात्र त्यासाठी राज्यानं पूर्ण तयारी केली आहे, मे अखेरीपर्यंत राज्यात कोरोनाबाधितांसाठी आणखी १३ ते १४ हजार खाटा उपलब्ध होतील अशी माहिती त्यांनी दिली. उपचारांदरम्यान रक्ताची गरज भासणार असून, त्यासाठी जमेल त्यांनी आरोग्यविषयक सुरक्षिततेचे नियम पाळून रक्तदानासाठी पुढे यावे असे आवाहन त्यांनी केले.
कोरोनावर औषध नसले तरी कोरोनाची बाधा झालेल्या रुग्णावर वेळेत उपचार करणे, आणि त्याला कोरोनामुक्त करणे शक्य होते, त्यामुळे कोरोनाविषयीचे लक्षण दिसत आहेत का यावर काटेकोर लक्ष ठेवावे, आणि अशी लक्षणे दिसू लागली न घाबरता लगेचच समोर यावे असे आवाहनही त्यांनी केले. पावसाळ्यात साथीचे आजार वाढण्याची शक्यता लक्षात घेऊन, या काळात लागलेल्या आरोग्यविषयक सवयी कायम ठेवाव्यात असा सल्लाही त्यांनी दिला.