सर्वोत्कृष्ट दहा लघुपटांच्या यादीत बिट्टु या लघुपटाची निवड

नवी दिल्ली (वृत्तसंस्था) : यंदाच्या ऑस्कर पुरस्कारांसाठी, लघु पटाच्या गटात भारतातली निर्मिती असलेल्या बिट्टु या लघुपटाची सर्वोत्कृष्ट दहा लघुपटांच्या यादीत निवड झाली आहे. मूळची दिल्लीची पण सध्या मुंबईत वास्तव्याला असलेल्या करीश्मा देव दुबे हीनं या लघुपटाचं दिग्दर्शन केलं आहे. करीश्मानं तिची बहिण श्रेया हिच्यासोबतच या लघुपटाची निर्मिती केली आहे.

या लघुपटानं याआधी स्टुडंट ऑस्कर स्पर्धेत रौप्य पदक जिंकलं आहे. आता ऑस्कर पुरस्काराच्या शर्यतीत पहिल्या दहा लघुपटांच्या यादीत समावेश झाल्यानं आनंद झाला असून, लवकरच हा लघुपट भारतातल्या प्रेक्षकांसाठी प्रदर्शित करणार असल्याचं करिश्मा हिनं आमच्या प्रतिनिधीशी बोलताना सांगितलं.