मुंबई-पुणे द्रुतगती महामार्गावर झालेल्या अपघातात चौघे ठार, तीन जण जखमी

मुंबई (वृत्तसंस्था) : मुंबई-पुणे द्रुतगती महामार्गावर खोपोलीजवळ बोरघाटात आज झालेल्या अपघातात चारजण जागीच ठार झाले, तर तीनजण गंभीर जखमी झाले आहेत. जखमींवर एम. जी. एम. रुग्णालयात उपचार सुरु आहेत. मृतांमधले तिघे सोलापूर जिल्ह्यातले तर एक जण तुळजापूरचा आहे. जखमी जालन्यातले आहेत. मुंबईकडे जाणाऱ्या मार्गिकेवर सकाळी साडे सहाच्या सुमाराला हा अपघात झाला. एका ट्रेलरचा ब्रेक फेल झाल्यानं सहा- सात वाहनं एकमेकांना धडकली. यात दोन मोठ्या वाहनांच्या मध्ये चिरडल्या गेलेल्या कारमधले चौघेही जागीच ठार झाले. अपघातानंतर महामार्गावरची वाहतूक विस्कळीत झाली होती, ती आता पूर्ववत झाली आहे.