उद्योग विभागातर्फे उत्कृष्ट निर्यातदारांचा राज्य पुरस्काराने २४ मार्चला होणार सन्मान

मुंबई : राज्य शासनाच्या उद्योग विभागातर्फे देण्यात येणाऱ्या उत्कृष्ट निर्यातदार या पुरस्कारांचे वितरण २४ मार्च २०२२ रोजी होणार आहे. २०१७-१८ या वर्षासाठी निवड झालेल्यांना हा पुरस्कार मुंबई येथील जागतीक व्यापार केंद्र येथे कार्यक्रमात देण्यात येणार असल्याचे उद्योग संचालनालयाने प्रसिद्धी पत्रकाद्वारे कळविले आहे.

राज्य शासनाच्या उद्योग विभागातर्फे राज्यातील उत्कृष्ट निर्यातदारांचा गौरव करण्यात येतो. २०१७-१८ या वर्षासाठी उत्कृष्ट निर्यातदार पुरस्कारांची निवड करण्यात आली होती. या पुरस्कारांचे वितरण उद्योगमंत्री सुभाष देसाई यांच्या हस्ते व उद्योग राज्यमंत्री कुमारी आदिती तटकरे, अपर मुख्य सचिव (उद्योग) तसेच विकास आयुक्त (उद्योग) तथा निर्यात आयुक्त यांच्या उपस्थितीत मुंबईच्या जागतिक व्यापार केंद्र येथे २४ मार्च २०२२ रोजी सकाळी ११ वाजता होणार आहे.