मुंबई (वृत्तसंस्था) : गेल्या काही दिवसांपासून कोरोनाबाधितांच्या संख्येत होत असलेली वाढ पाहता, निर्बंध नको असतील तर नागरिकांनी स्वतःहून शिस्त पाळावी, असं आवाहन मुख्यमंत्री उध्दव ठाकरे यांनी केलं आहे. ते मुंबईत कोरोना कृती दलाच्या बैठकीत बोलत होते.
नागरिकांनी मास्क वापरावा, लसीकरण करून घ्यावं, हात धुवावेत आणि सुरक्षित अंतराचं पालन करावं. राज्य शासन पुढचे पंधरा दिवस लक्ष ठेवून असेल, असं त्यांनी सांगितलं.
कोविड कालावधीत उभारलेली फिल्ड रुग्णालयं व्यवस्थित आहे का ते पहावं, त्यांचं स्ट्रक्चरल ऑडिट करुन घ्यावं, अशा सूचना त्यांनी आरोग्य विभागाला दिल्या. कोविड चाचण्यांचे प्रमाण वाढवावं, कोविड विषाणूचा नवीन प्रकारांबाबत सतर्क राहाव, अशा सूचनाही त्यांनी दिल्या.
लवकरच शाळा सुरू होतील. शाळेच्या बाबत जागतिक स्तरावर काय निर्णय घेतले गेले आहेत, तेथील मुलांना संसर्ग होण्याची स्थिती काय आहे, याबाबत माहिती घ्यावी, असेही मुख्यमंत्री उध्दव ठाकरे यांनी सांगितले.
