नवी दिल्ली (वृत्तसंस्था) : परदेशातून येणाऱ्या प्रवाशांसाठी आरोग्य मंत्रालयानं सुधारित मार्गदर्शक सूचना काल जारी केल्या. या महिन्याच्या १४ तारखेपासून ही नियमावली लागू करण्यात येणार आहे. RT-PCR चाचणीचा निगेटिव्ह अहवाल अपलोड करण्याऐवजी संपूर्ण प्राथमिक लसीकरण पूर्ण केल्याचं प्रमाणपत्र अपलोड करण्याचा पर्याय आता प्रवाशांना मिळणार आहे.
ज्या देशांमध्ये भारतीय लसीचं प्रमाणपत्र ग्राह्य धरलं जातं अशा देशातील प्रवाशांसाठीच हा नियम लागू राहणार आहे. त्याचप्रमाणे या नवीन नियमावलीनुसार विमानतळावर आगमन झालेल्या कुठल्याही २ टक्के प्रवाशांची चाचणी केली जाणार आहे. अशा प्रवाशांची निवड संबंधित विमान कंपन्यांकडून सरसकट केली जाणार आहे.
चाचणीचे नमुने दिल्यानंतर अशा प्रवाशांना लगेच घरी जाण्याची परवानगी देखील आता दिली आहे. या नवीन मार्गदर्शक तत्त्वांनुसार आगमनानंतर ७ दिवसांचं गृहविलगीकरण आता बंधनकारक नसेल; त्याऐवजी आता १४ दिवस स्वतःचं आरोग्य निरीक्षण करणं अनिवार्य असल्याचं या तत्त्वांची मुख्य वैशिष्ट्ये अधोरेखित करताना आरोग्य मंत्री मनसुख मांडविय यांनी स्पष्ट केलं.
जोखीम गटातले देश ही श्रेणी सुद्धा आता रद्द करण्यात आली असून आगमनानंतर ८ व्या दिवशी करावी लागणारी RT-PCR चाचणी आणि Air Suvidha portal वर त्याचा अहवाल अपलोड करणं देखील आता बंधनकारक नसणार आहे. सर्वांना या मार्गदर्शक तत्त्वांचं काटेकोरपणे पालन करण्याचं आणि या लढाईत देशाला पाठिंबा देण्याचं आवाहन मांडवीय यांनी केलं आहे.
