नवी दिल्ली (वृत्तसंस्था) : भारत आणि न्यूझीलंड यांच्यात मुंबईच्या वानखेडे स्टेडिअममध्ये झालेला दुसरा कसोटी क्रिकेट सामना भारतानं ३७२ धावांनी जिंकला. याबरोबरच भारतानं ही दोन सामन्यांची मालिकाही १-० अशी जिंकली आहे. या मालिकेतला पहिला सामना अनिर्णित राहिला होता. आज सामन्याच्या चौथ्या दिवशी न्यूझीलंडनं कालच्या ५ गडी बाद १४० धावांवरून आपला दुसरा डाव पुढे सुरु केला. मात्र आर अश्विन आणि जयंत यादवच्या फिरकीसमोर, दिवसाच्या पहिल्या सत्रातच अवघ्या ११ षटकं आणि ३ चेंडुंमध्ये न्यूझीलंडचा दुसरा डाव १६७ धावांमध्येच आटोपला. न्यूझीलंडच्या वतीनं डॅरेल मिशेल यानं सर्वाधिक ६० तर हन्री निकोलस यानं ४४ धावा केल्या. भारताच्या आर अश्विन आणि जयंत यादव यांनी प्रत्येकी ४ तर अक्षर पटेलनं एक गडी बाद केला. मयांक अगरवाल याला सामनावीर तर रविचंद्रन अश्विन याला मालिकाविराच्या पुरस्कारानं गौरवलं गेलं.
