नवी दिल्ली (वृत्तसंस्था) : प्रधानमंत्री नरेंद्र मोदी यांनी आज उत्तर प्रदेशातल्या वाराणसी इथं श्री काशी विश्वनाथ धामच्या पहिल्या टप्प्याचं उद्घाटन केलं. यावेळी ३ हजाराहून अधिक मान्यवर आणि साधु उपस्थित होते. ३३९ कोटी रूपये खर्च करून हे धाम बांधलं असून हा प्रकल्प पाच लाख चौरस फूट परिसरात पसरलेला आहे. प्रधानमंत्र्यांच्या देखरेखीखाली हा प्रकल्प विकसित झाला असून मार्च २०१९ मधे त्याचा कोनशिला समारंभ त्यांच्याच हस्ते झाला. या प्रकल्पामुळे गंगा घाट आणि काशी विश्वनाथ मंदिर एकमेकांना थेट जोडले जाणार आहेत. पहिल्या टप्प्यात २३ इमारतींचं उद्घाटन झालं असून त्यामुळे भाविकांना अनेक सेवासुविधा उपलब्ध झाल्या आहेत. दिव्यांग आणि ज्येष्ठ नागरिकांसाठी विशेष सेवा पुरवल्या जाणार आहेत. प्रधानमंत्र्यांनी सुरूवातीला कालभैरव मंदिरात जाऊन दर्शन घेतलं. पूर्वी ३ हजार वर्ग फूट क्षेत्रफळावर असलेला परिसर आता ५ लाख वर्ग फुटापेक्षा अधिक झाला आहे. या कॉरिडॉरमुळं काशीमध्ये जाणं सोप होणार आहे असं प्रधानमंत्री यावेळी म्हणाले.
