नवी दिल्ली (वृत्तसंस्था) : कोविड१९चा प्रादुर्भाव रोखण्यासाठी सुरु असलेल्या प्रयत्नामुळे, भारत आत्तापर्यंत कोरोनाचा सामुदायिक प्रसार रोखण्यात यशस्वी ठरला असल्याचं केंद्रीय आरोग्यमंत्री डॉक्टर हर्षवर्धन यांनी म्हटलं आहे. आजवर देशात देवी आणि पोलिओ सोडून इतर कोणताही साथीचा आजार समूळ नष्ट झालेला नाही. ते परत येत राहतात असं सांगत त्यांनी कोरोनाचा दीर्घकाळ अस्तित्वात राहण्याची शक्यता व्यक्त केली.
मात्र त्याचवेळी या आजारामुळे लोकांच्या आरोग्य आणि स्वच्छताविषयक सवयी बदलु लागल्या आहेत, त्या अशाच कायम राहिल्या तर, या आजाराचा जोर ओसरल्यानंतर आरोग्यदायी समाज पाहायला मिळेल असा विश्वासही हर्षवर्धन यांनी व्यक्त केला आहे. वृत्तसंस्थेने हे वृत्त दिलं आहे. अर्थव्यवस्थेसोबतच लोकांचं आरोग्यही महत्वाचं असल्यानंच सध्याच्या संचारबंदीला १७ मे पर्यंत मुदतवाढ दिल्याचं ते म्हणाले.
