नवी दिल्ली (वृत्तसंस्था) : हिंसेविरुद्ध दाद मागण्यासाठी महिलांकरता विशेष दूरध्वनी मदत क्रमांकाचं उद्घाटन केंद्रीय महिला आणि बालकल्याण मंत्री स्मृती इराणी यांनी आज केलं. ७८२ ७१७ ०१ ७० हा विशेष मदत क्रमांक उपलब्ध करुन दिल्याबद्दल त्यांनी राष्ट्रीय महिला आयोगाचं अभिनंदन केलं. तातडीच्या आणि बिनतातडीच्या प्रकरणातही २४ तास या क्रमांकाची सेवा उपलब्ध राहील. संकटकाळी आयोग आणि सरकार महिलांच्या पाठीशी खंबीरपणे उभं राहील असं इराणी म्हणाल्या. देशभरातल्या महिलांना पोलीस, रुग्णालय, कायदाविषयक मार्गदर्शन तसंच मानसशास्त्रीय समुपदेशन अहोरात्र उपलब्ध रहावं याकरता या क्रमांकाची सेवा सुरु करण्यात आली आहे. या सेवा जोडून देण्याचं काम तसंच याविषयीची माहिती या मदत क्रमांकावर मिळणार आहे.
