मुंबई (वृत्तसंस्था) : श्रुती संवाद साहित्य कला अकादमीतर्फे देण्यात येणारा ‘राजीव सारस्वत सन्मान’ पानिपत, महानायक, झाडाझडती यांसह अनेक साहित्यकृतींचे लेखक विश्वास पाटील यांना राज्यपाल भगतसिंह कोश्यारी यांच्या हस्ते राजभवन इथं काल प्रदान करण्यात आला. प्रसिध्द साहित्यिक, कवी आणि हिंदुस्थान पेट्रोलियममधे महाव्यवस्थापक पदावर कार्यरत असलेल्या राजीव सारस्वत यांचं मुंबईवर झालेल्या 26 नोव्हेंबर 2008 च्या अतिरेकी हल्ल्यात निधन झालं होतं. त्यांच्या स्मृतीप्रित्यर्थ श्रुती संवाद साहित्य कला अकादमीतर्फे साहित्यिकांना ‘राजीव सारस्वत सन्मान’ देण्यात येतो. कार्यक्रमाला श्रुती संवाद अकादमीचे अध्यक्ष अरविंद राही, हिंदुस्थान पेट्रोलियमचे व्यवस्थापक पुष्प जोशी आदी उपस्थित होते.
