लोकशाही पुरस्कारांचे शनिवारी उपराष्ट्रपतींच्या हस्ते वितरण

मुंबई : राज्य निवडणूक आयोगातर्फे दिल्या जाणाऱ्या पहिल्या लोकशाही पुरस्कारांची घोषणा राज्य निवडणूक आयुक्त ज. स. सहारिया यांनी मुंबईत केली. उपराष्ट्रपती एम. वेंकैया नायडू यांच्या हस्ते व मुख्यमंत्री देवेंद्र फडणवीस यांच्या प्रमुख उपस्थितीत येत्या शनिवारी या पुरस्कारांचे वितरण करण्यात येईल, असे सहारिया यांनी सांगितले. मुंबईतील हॉटेल आयटीसी मराठामध्ये 27 जुलै रोजी सकाळी 10 वाजता पुरस्कार प्रदान समारंभ आयोजित करण्यात आला आहे. सन 2016 आणि 2017 या कालावधीत पार पडलेल्या नागरी व ग्रामीण स्थानिक स्वराज्य संस्थांच्या निवडणुकांदरम्यान नावीन्यपूर्ण उपक्रम राबविण्यात पुढाकार घेतल्याबद्दल विविध संस्था आणि व्यक्तींना हे पुरस्कार प्रदान करण्यात येणार आहेत. यावेळी वेगवेगळ्या सहा गटात एकूण 14 पुरस्कार प्रदान करण्यात येतील.

राज्यघटनेच्या 73 आणि 74 व्या दुरुस्तीनंतर 1994 साली राज्य निवडणूक आयोगाची स्थापना झाली. या आयोगांकडे स्थानिक स्वराज्य संस्था आणि राज्यांच्या निवडणुकांची जबाबदारी असते.  महाराष्ट्र राज्य निवडणूक आयोगाला 25 वर्ष पूर्ण होत असल्याचे औचित्य साधत 2017 ते 19 या काळात एक विशेष सर्वेक्षण करण्यात आले. या सर्वेक्षणाच्या अहवालानुसार स्थानिक स्वराज्य संस्थांच्या निवडणुकांना संबंधितांकडून विशेष महत्व दिले जात नाही असे निष्पन्न झाले. या पार्श्वभूमीवर देशाची लोकशाही बळकट करणाऱ्या स्थानिक स्वराज्य संस्थांना महत्व मिळावे या दृष्टीने या संस्थांच्या निवडणुकांमध्ये उल्लेखनीय कामगिरी करणाऱ्या व्यक्ती आणि संस्थांना लोकशाही पुरस्कार देण्याचा निर्णय राज्य निवडणूक आयोगाने घेतला. त्यानुसार पहिल्या लोकशाही पुरस्कारांची घोषणा करण्यात आली आहे. स्वयं शासन आणि स्थानिक स्वराज्य संस्थांना महत्व देणाऱ्या महात्मा गांधी यांना यांच्या 150 व्या जयंतीनिमित्त ही विशेष आदरांजली देण्याचा निवडणूक आयोगाचा प्रयत्न आहे असे राज्य निवडणूक आयोगाचे सचिव किरण कुरुंदकर यांनी सांगितले.

गटनिहाय पुरस्कार विजेत्यांची नावे अशी:-