मुंबई (वृत्तसंस्था) : संघटन हेच शिवसेनेचं खरं बलस्थान असून विदर्भात पक्ष संघटन आणि पक्षाची व्याप्ती वाढवण्यासाठी शिवसेनेनं आजपासून शिवसंपर्क अभियान सुरु केल्याची माहिती शिवसेनेचे खासदार संजय राऊत यांनी दिली. राऊत यांच्या हस्ते आज नागपुरात या अभियानाचा आरंभ झाला, त्यावेळी ते बोलत होते. विदर्भातल्या शिवसेनेच्या पदाधिका-यांशी संवाद साधण्याच्या हेतूने आणि मतदारसंघनिहाय आढावा घेण्यासाठी या अभियानात भर दिला जाणार आहे, असं ते म्हणाले. शिवसेनेचं विदर्भातलं विधानसभेचं प्रतिनिधित्व का कमी झालं याचा अभ्यास करून जिथे शिवसेना लढू शकली नाही, त्या मतदारसंघात शिवसेनेची ताकद पुनर्स्थापित करावी, असं आवाहन राऊत यांनी उपस्थित कार्यकर्त्यांना केलं.
